«Heimatland» - Gedicht & Fotos: Beat Hirt / Content Creator: Markus Hutmacher
Mis Heimetland
Ofem Voguberg ob Mümliswil, do gsehsch du d'Welt vo obe,
vom Säntis bes hender d'Blüemlisalp de ganzi Alpeboge
Wälder, Wiese, Dörfli ganz chli,
s'cha eifach niene schöner si.
Ond schiint der erschti Sonneschtrahl
öber s'ganze Goudetal
denn weisch, sesch gmacht vo Gotteshand,
euses schöne Heimetland.
Dräisch di denn no Basel zue,
dert onde gets kei Rascht ond Rueh
ir Färni chasch de Flogplatz gseh,
doch i wett niene anders he,
drom goni i jetz abe is Goudetal
erwärmt vom glänzige Sonneschtrahl
ond weiss, sesch gmacht vo Gotteshand,
euses schöne Heimetland.
Ond wenn de d'Sonne ondergoht,
den werd de Hemmu mängisch rot
dert hende, öberem Scheltepass
ond eusi Ouge, for Freud grad nass.
s'chert weder Rueh ond Frede ii,
sesch Ziit im Herrgott dankbar d'sii.
mer wösse, sesch gmacht vo sinere Hand,
euses schöne Heimetland.
Wenn denn mis Läbe z'Endi goht,
viellecht ame Sommerobe schpoht,
de bitte do im Goudetal
es brucht derzue kei Sonnestrahl,
i gseh jo s'Liecht ir Färni scho
ond freu mi de i Hemmu z'cho.
De gon i met, a Gotteshand
is allerschönschte Heimetland. (Beat Hirt)
